ستوديو كورة بلس: محمد عبد الوهاب يحلل كيف استفاد كولر من علي معلول وطريقة تعامله الأمثل مع اللاعب 🗣️

وجهة نظري في مباراة اليوم
كلمة السر اليوم هو مروان عطية ربنا يحميه
مع عدم إغفال دور الشناوى وحمدي فتحي وعبدالمنعم ومجهودهم وكفاءتهم النهاردة وإن فعلاً الشناوي أنقذ هدفين من الهجمتين الوحيدتين إللي راحو عليه ولكن من وجهة نظري بطل المباراة بلا منازع هو مروان عطية وبعد كده أي حد تاني لأن لو مروان عطية مش موجود النهاردة مكنتش هتلاقي هجمتين فقط إللي هيروحوا على الشناوي ومنهم كمان ضربة ثابتة بالعكس كنت هتلاقي انفرادات بالجملة خصوصا إن خط هجوم الرجاء هذا الموسم من أقوى خطوط الهجوم في أفريقيا وكمان تحولاتهم من الحالة الدفاعية للحالة الهجومية من افضل الفرق إللي بتعملها في أفريقيا وكمان بيعملوها بسرعة عالية جداً ولكن بستر ربنا ومجهود اللاعبين وعلى رأسهم مروان عطية ربنا يحميه قدر يفسد معظم هجمات الرجاء قبل ما تعدي نصف الملعب وتروح هجمة على الشناوي
كلنا شايفين مروان عطية ما شاء الله مالي منطقة نص الملعب وبيغطي علي معلول وكمان بيغطي على هاني غير إنه بينزل في الصندوق بتاعنا لأداء أدواره الدفاعية وشال اكتر من كرة دا غير أدواره الهجومية والمساعدة الكبيرة إللي بيقدمها للخط الخلفي أثناء التدرج بالكرة وبناء اللعب وأكبر ميزة فيه إنه بيعرف يبوظ هجمات المنافس وبيقدر يستخلص الكرة بدون فاولات وإحنا عندنا في الأهلي ثلاثة بيعرفوا يستخلصوا الكرة مروان وحمدي فتحي وديانج لكن حمدي وديانج بيستخلصوها وبيبوظوا هجمة المنافس بفاول لكن مروان ربنا يحميه بيستخلص الكرة بدون فاول وكمان بيبني بيها هجمة أنا شايف إنه أفضل مركز ستة في مصر حالياً خاصة إن مركز ستة حاليا في أوروبا مش زي زمان إن يكون دوره مقتصر على افتكاك الكرة وخلاص لأ دور ستة دلوقتي إنه يبقى لاعب كوير وباصير كويس ولاعب ستة حاليا أصبح أهم لاعب بيحتاجه الفريق علشان يطلع عليه من الحالة الدفاعية للحالة الهجومية أثناء التدرج بالكرة وبناء اللعب وما شاء الله مروان بيقدر يعمل ده ربنا يبارك فيه ويحميه ويبعد عنه شر الإصابات
من وجهة نظري إنه من افضل الصفقات في السنوات الأخيرة سواء الأجنبية أو المحلية
راجعوا المباريات الأخيرة للأهلي وشوف أي لاعب في الأهلي بيتزنق في الكرة سواء في الخط الأمامي أو الخط الخلفي وعليه ضغط قوي بيلاقي مين فاتحله زاوية تمرير مفيش غير مروان عطية
وعلى الجانب الآخر كمان نفسي بصراحة القندوسي ياخذ فرصته وهيبقى جامد جدا وهيبقى نفس نسخة مروان عطية كده بس في مركز ثمانية بس ياخد كام مباراة ورا بعض أساسي تسعين دقيقة وهيبقى أفضل مركز ثمانية في مصر لأن ميزة القندوسي إنه يقدر يلعب مركز ثمانية بأدوار ومهام مركز عشرة زي الدور إللي كان بيعمله فرجاني ساسي مع الزمالك وهو إنه كان بيلعب مركز ثمانية بمهام وأدوار مركز عشرة
إحنا عندنا أفشة بيلعب عشرة كويس وضعيف ثمانية والسولية قوي ثمانية وضعيف عشرة
فإذا كان عندنا لاعب يعتبر خليط بين الاثنين بيجيد لعب المركزين فلماذا لا أستخدمه في مركز ثمانية بمهام مركز عشرة مثل فرجاني ساسي
خاصة إن القندوسي كان بيلعب المركزين في فريقه السابق أوقات كان بيلعب ثمانية وأوقات كان بيلعب عشرة خاصة إنه بيكمل كويس خلف المهاجمين وبيدخل الصندوق وباصير كويس والفنش جيد وشويط ورجله حلوة على المرمى
وأنا مستغرب بصراحة إذا مكنش هياخد فرصة في الفترة دي والسولية وديانج واقعين هياخدها امتى
أتمنى أشوف ثلاثي خط الوسط مروان وحمدي فتحي والقندوسي ويكون السولية وديانج احتياطي لاراحة الثلاثي الأساسي